Samkvæmt reglugerð nr. 654/2009 ber framhaldsskólum að setja sér móttökuáætlun fyrir nemendur með annað móðurmál en íslensku. Markmið náms er að nemendur verði færir um að skilja og nota íslenskt mál.
Innritun og móttökuviðtal
Þegar nemandi innritar sig í skóla hefur náms- og starfsráðgjafi frumkvæði að því að skipuleggja viðtal með nemanda (og foreldrum/forráðamönnum ef við á). Markmið með viðtali er að afla upplýsinga um bakgrunn nemanda og aðstæður hans, svo skólinn geti þjónustað hann sem best. Í viðtalinu fær nemandi (og foreldrar/forráðamenn) nauðsynlegar upplýsingar um skólann, starfsemi hans og þær reglur sem þar gilda. Nemandi fær kynningu á þjónustu og þeim stuðningi sem stendur honum til boða, bæði hvað varðar námi, stuðning frá náms- og starfsráðgjafa ásamt kynningu á félagslífi nemenda við skólann.
Samstarf við foreldra og grunnskóla
Komi nemandi úr grunnskóla hér á landi hefur náms- og starfsráðgjafi samband við foreldra/forráðamenn og biður þá um að afla viðeigandi upplýsinga frá grunnskóla í samræmi við gildandi persónuverndarlög, skv. reglugerð nr. 585/2010 IV. kafla 17. gr., þannig að sem best verði komið til móts við þarfir hans.
Einstaklingsmiðað nám
Í samráði við náms- og starfsráðgjafa skipuleggur nemandi nám sitt og metur ráðgjafi hvort hægt sé að styðja nemanda betur, t.d. hvort ástæða sé til að minnka álagið í námi, með því að fækka þeim fögum sem nemandi situr í hverju sinni. Náms- og starfsráðgjafi er tengiliður nemenda við stjórnendur og kennara. Áhersla er lögð á að nemandinn sitji í almennum áföngum til að styrkja félagsleg tengsl og ýta undir félagslega aðlögun.
Jafningjastuðningur
Náms- og starfsráðgjafi metur þörfina á því að nemandi fái sérstakan stuðningsaðila úr hópi samnemenda. Ef þörf er á velur hann, í samvinnu við umsjónarkennara og stjórnendur, einn eða fleiri nemendur sem stunda nám á svipuðu stigi. Þessir stuðningsaðilar aðstoða nemanda við að læra á skólaumhverfið og aðlagast menningu skólans. Áhersla er lögð á að stuðningur sé á jafningjagrunni. Stjórnendur meta hvort jafningjastuðningur sé metinn til eininga í hverju tilfelli fyrir sig.
Eftirfylgni
Stjórnendur og kennarar fylgjast með námframvindu allra nemenda. Kennarar grípa inn í ef námsframvinda, mæting eða félagsleg aðlögun nemanda er óviðunandi og hafa samráð við náms- og starfsráðgjafa og stjórnendur um úrbótaleiðir.