Hópurinn var í viku ferð á Íslandi að kynna sér endurnýjanlega orku, ferðamennsku, fjármálalíf og stjórnmál. Sem liður í kynningu þeirra á nýtingu Íslendinga á vistvænum og endurnýjanlegum orkugjöfum, heimsótti hópurinn Keili.

 

Fyrir utan kynningu á starfsemi og námsbrautum Keilis í aðalbyggingu skólans, fékk hópurinn yfirlit yfir notkun á orkugjöfum og þróun á nýtingu auðlinda á Íslandi, ásamt því að skoða aðstöðu Orku- og tækniskólans. Að því loknu heimsótti hópurinn Reykjanesvirkjun, en HS Orka bauð þeim að skoða bæði virkjunina og borholu á svæðinu, ásamt því að sjá sýninguna Orkuverið Jörð.

 

Mikill áhugi var hjá nemendum og forstöðumönnum Lehigh um námið og aðstöðu Keilis til rannsókna og tilrauna á vistvænu eldsneyti. Einnig lýsti hópurinn yfir áhuga á að koma aftur til Keilis til að fá ítarlegri kynningu á endurnýjanlegum orkugjöfum á Íslandi, nýta aðstöðu skólans til rannsókna á vistvænu eldsneyti og fá enn betri mynd af nýtingu á jarðhita á Reykjanesinu.