Fara í efni

Samstarfsverkefni tæknifræðinámsins vinnur til verðlauna

12.10.2015
William Foley
William Foley

Cooper Union í New York í Bandaríkjunum hefur á undanförnum árum komið að samstarfsverkefni með tæknifræðinámi Háskóla Íslands og Keilis þar sem skoðað er hvernig nýta má affall heitavatns til að hraða plöntuvöxt. Rannsóknirnar og samstarfsverkefnið er leitt af prófessor Robert Dell við Cooper Union háskólann.

William Foley, frá Cooper Union sem hefur komið að þessu verkefni, vann nýverið til verðlauna fyrir bestu framsöguna á Geothermal Resources Council Annual Conference 2015. Fyrirlestur hans fjallaði um hönnun hans á sjálfstýrðum vökvunarbúnaði ?Autonomous Irrigation and Control System? en kerfið er sérstaklega hannað fyrir ylræktargarða á Íslandi og upphitaða garða á þökum bygginga í New York. 

Hægt er skoða upptöku af fyrirlestri William Foley hér.

Ræktun í upphituðum jarðvegi

Á Suðurnesjum og víða um Ísland á gróður erfitt uppdráttar. Markmið verkefnisins er að skoða hvort hægt sé að nota affallsvatn húsa til að hita upp jarðveg og gefa gróðri þannig betra tækifæri til að komast á legg og nýta með því betur þá orku sem annars færi til spillis.

Settir hafa verið upp tilraunareitir á lóð Keilis, en með reglulegum mælingum á hita og rakastigi í reitunum, ásamt því að fylgjast vel með vexti gróðursins, er ætlunin að finna út hvaða hitastig og jarðvegsdýpt hentar gróðri best, auk þess að sjá hvaða áhrif hitinn hefur á vaxtarhraða og vaxtartímabil. Tilraunareitirnir eru allir með snjóbræðslukerfi undir moldinni. Kerfið er þrískipt. Á einu kerfinu er 60°C heitt vatn, á öðru 40°C  heitt, en á síðasta kerfinu er ekkert vatn. Þannig fæst samanburður við ræktun í óupphitaðri mold. Reitirnir eru einnig mis djúpir og er gróðurmoldin 10 - 30 cm á dýpt.
 
Notkunarmöguleikar eru meðal annars að hægt verður að nýta affallsvatn húsa til að styðja við  trjárækt, til dæmis hér á Ásbrú. Einnig má hugsa sér að hægt verði að lengja vaxtartímabil matjurta sem jafnvel gæti þýtt að matjurtir sem ekki hafa áður náð að þrífast á Íslandi gætu náð að vaxa og dafna utandyra í framtíðinni.
 
Til baka