Iðnmenntun veitir forskot 

Hjálmar segir tæknifræði og verkfræði tvær greinar af sama meiði. "Þar er önnur teóretísk og hin praktísk. Tæknifræðingur sér til þess að það sem verkfræðingurinn hefur teiknað upp komist í framkvæmd. Þetta er sjálfstæð BS-gráða á háskólastigi og getur staðið ein og sér eða verið sterk viðbót við annað nám á tengdum sviðum." 

Hjálmar segir að tæknifræðinámið ætti að geta átt sérstaklega vel við þá sem hafa iðnmenntun að baki og vilja gera sig verðmætari á vinnumarkaði. Tæknifræðin geti t.d. brúað bilið yfir í aðra geira eftir að byggingariðnaðurinn staðnaði. "Iðnaðarmenn hafa mjög góðan grunn fyrir þetta nám því góður tæknifræðingur þarf að hafa góða innsýn í hvernig ferlar og verkefni ganga fyrir sig í raun, og þekkja handtökin sem þarf að vinna. Þetta er fag sem vissulega reynir á stærðfræði og útreikninga, en byggist ekki síður á verklegri útsjónarsemi, og þar hafa iðnaðarmenn oft mikið forskot," segir hann en meðallaun íslenskra tæknifræðinga eru um 600 þús. kr. á mánuði. 

Hjá Keili er reynt að leita allra leiða til að auðvelda fólki að hefja nám að nýju og þess gætt að finna hverjum og einum nemanda stað sem hæfir honum. "Margir eru kannski með að baki vinnu eða menntun á ákveðnum sviðum og þá er hægt að meta það inn í námið svo ekki þarf að byrja alveg á byrjunarreit. Umsækjendur eru metnir á einstaklingsforsendum og stungið inn í kerfi sem hentar hverjum og einum og sá sem þarf að bæta við sig t.d. stærðfræðigreinum getur byrjað á einum stað, á meðan annar nemandi byrjar á öðrum stað. Gráðan er sú alltaf sú sama og hvergi vikið frá þeirri kröfu að nemendur útskrifaðist sem fullfærir tæknifræðingar."

Reynt er að bjóða sem mestan sveigjanleika og segir Hjálmar t.d. hægt að taka námið í þrepum með því að ljúka fyrst diplómagráðu áður en ráðist er í fulla BS-gráðu. "Ef fólk ákveður að taka sér hlé í miðju námi er það með fullgildar háskólaeiningar í farteskinu, viðurkenndar af Tæknifræðingafélagi Íslands, og getur tekið upp þráðinn hvenær sem er, bæði hérlendis og erlendis."