Föstudaginn 27. nóvember gefst tækifæri til að bregða sér aftur til níunda áratugar síðustu aldar og skoða sýnishorn af þeim tölvubúnaði sem ruddi veginn úr rannsóknarstofum og vísindastofnunum yfir í smærri fyrirtæki og síðan heim í stofu til tækniþyrstra dellukarla.
Þórhallur Ragnarsson, nemandi í tæknifræðinámi Háskóla Íslands og Keilis, hefur safnað tölvum um árabil og sýningin er verkefni sem hann skilaði í námskeiði í tövluhögun við skólann.
Meðal búnaðar á sýningunni eru Sinclair tölvur, Amstrad, IBM PC, Macintosh Plus og Atari. Upplýsingar um búnaðinn eru teknar saman á veggspjöldum, flestar tölvurnar eru gangfærar og hægt að sjá hvernig hugbúnaður var í boði til leikja og starfa. Hermar (emulators) verða í gangi á nútímatölvum og þeir sem vilja geta spreytt sig á einföldum forritunaræfingum í BASIC og ef til vill fleiri málum.
Sýningin verður opin föstudaginn 27. nóvember 14:00 - 18:00. Hún fer fram í stofu A4 í aðalbyggingu Keilis að Grænásbraut 910 á Ásbrú. Allir velkomnir að koma og sjá og endurlifa gömlu tölvuleikina sína.